2019年8月21日 星期三

睇牙記

終於book 左種牙骨手術,不過十月至有位😅😅😅
之前曾經講過我有需要植牙,但成八萬蚊,我一直吾捨得。 經過一輪輾轉反側之後,我決定要植牙了!

我有個好朋友介紹咗我一個佢認為非常好嘅牙醫,其實間診所係有好多個醫生一齊嘅聯合診所,位於中環,而會幫我做手術嘅牙醫係一個
Oral & Maxillofacial Surgery 口腔頜面外科醫生。

口腔頜面醫生屬於牙科外科醫生嘅一種,並不是普通牙醫,佢哋會擅長於做顎骨顴骨面頜嘅手術,香港其實得幾十個呢個專科嘅醫生。

植牙點解會出動到面颌外科醫生呢?係因為我照完ct發現我唔夠牙骨,因為我隻牙甩咗成廿幾年,我都冇理過佢,所以啲牙骨退化咗。首先我就需要种返啲骨係個位,用半年時間等佢自己生番,之後先可以繼續做植牙嘅治療。 成個療程大概要一年。

我因為太怕痛啦,我準備做舒眠麻醉sedation. 當然又要畀埋麻醉醫生嘅費用,所以成個手術夾埋大概要畀八萬幾蚊(連埋之後的植牙)

我掙扎咗好耐我真係覺得好肉痛,不過諗諗下,我唔小心逗下又一個月。本來諗住六月底遞信捱到而家都仲喺度撈緊,咁就當我多做嗰幾個月畀手術費囉!

今日重新整牙套
我因為之前喺第二間診所做個牙套失敗了,個牙套其實唔啱位,做得唔好,令到我牙套本身隻牙同埋側邊嗰兩隻牙長期 攝咗啲食物入去, 三隻都蛀咗。 我決定植牙手術前都搞埋佢,去返同一間診所但係另一位嘅牙醫幫我處理。

老實講本人睇牙醫嘅經驗非常少,啲牙係差,但係我成日諱疾忌醫,因為我係極怕痛。今日去到間診所 係中環嗰間聯合診所嘅尖沙咀分診所,裝修一樣咁靚,全海景,服務周到,姑娘有heart, 成個治療都令我覺得好受重視好舒服,好乾淨, 每一個step都解釋得好清楚畀我聽, 所有儀器包括我訓嘅凳我都覺得令我覺得賓至如歸嘅感覺。

一開始我係十分之驚,因為要整爛我本身嘅牙套,整個新的牙套,另外補埋三隻牙。我係超怕痛嘅,估唔到今日打麻醉針嗰陣時居然唔係好痛。跟住成個過程都好舒服, 佢好有心機去處理我啲牙,今日都搞成個幾鐘,最後埋單都係萬一蚊,包曬補牙換牙套整臨時牙套,所有服務!我覺得非常之抵!

今日牙醫同我講,而家咁痛苦(我驚到差啲練爆姑娘隻手),係咪好後悔以前冇著重牙齒嘅保養呢?我覺得好啱喎,不過通常老咗就會後悔細個時做啲年少輕狂戇居嘢囉, 咁但係個個都會有呢個經歷,就算而家我語重心長咁同啲後生嘅講,佢哋都係照唔會聽我講, 就好似我以前細個時冇聽啲老一輩嘅人講咁囉!

我而家梗係好後悔啦!我想返返去廿年前摑我自己添!